- 01/09/2025
- 70
Bilimler we talyp ýaşlar güni hem-de 2025-2026-njy okuw ýylynyň başlanmagy mynasybetli «Halkara parahatçylyk we ynanyşmak ýyly» atly aýdym-sazly baýramçylyk dabarasy geçirildi
2025-nji ýylyň 1-nji sentýabrynda Türkmenistanyň Telekommunikasiýalar we informatika institutynda Bilimler we talyp ýaşlar güni hem-de täze okuw ýylynyň başlanmagy mynasybetli «Halkara parahatçylyk we ynanyşmak ýyly» atly aýdym-sazly baýramçylyk dabarasy geçirildi. Baýramçylyk dabarasyna Türkmenistanyň Aragatnaşyk ministri, institutyň rektory, professor-mugallymlar we talyp ýaşlar gatnaşdylar.
Baýramçylyk dabarasynyň dowamynda Türkmenistanyň Çuňňur Hormatlanylýan Prezidenti Serdar Berdimuhamedowyň täze okuw ýylynyň başlanmagy mynasybetli Türkmenistanyň mekdep okuwçylaryna, talyp ýaşlaryna, mugallymlaryna we bilim işgärlerine iberen Gutlagy okaldy. Institutyň mugallymlaryň we talyplaryň adyndan Arkadagly Serdarymyza hoşallyk sözleri aýdyldy we institutyň 1-nji ýyl talyplaryna talyplyk şahadatnamalary gowşuryldy. Dabaranyň dowamynda institutyň “Ýüpek ýollar” aýdym-saz we tans toparynyň çykyşlary, 1-nji ýyl talyplaryň ýürek buýsançlary dabaranyň şowhunyny has-da artdyrdy.
Ilkinji jaň kakylmagy bilen institutyň 1-nji ýyl talyplary Döwlet Baýdagyna tagzym edip, 2025-2026-njy okuw ýylynyň «Halkara parahatçylyk we ynanyşmak ýyly» atly ilkinji okuw sapagyna gatnaşdylar.
