• 26/08/2024
• 146

HALKARA TEJRIBESI ÖWRENILÝÄR

    Arkadagly Serdarymyzyň öňdengörüjilikli başlangyçlary, oýlanyşykly özgertmeleri we toplumlaýyn maksatnamalary esasynda ýurdumyzyň bilim ulgamyny has-da kämilleşdirmek ugrunda durmuşa geçirilýän işleriň çäklerinde daşary ýurtlaryň ýokary okuw mekdepleri, önümçilik kärhanalary bilen arabaglanyşygyny pugtalandyrmaga, abraýly halkara ylym we bilim edaralary bilen hyzmatdaşlygyň ýola goýulmagyna giň mümkinçilikler döredilýär.

    Halkara hyzmatdaşlygynyň çäklerinde Türki Döwletleriň Guramasy tarapyndan 2024-nji ýylyň 21-25-nji awgusty aralygynda Türkiýe Respublikasynyň Bursa şäherinde geçirilýän “2-nji Kosmos gözlegçileri” atly okuw maslahatyna Türkmenistanyň Telekommunikasiýalar we informatika institutynyň mugallymlary Kuwwat Abraýew we Begenç Annaýew gatnaşýarlar. Bu çärä Azerbaýjandan, Gyrgyzystandan, Özbegistandan, Türkmenistandan we Türkiýeden 50-den gowrak mekdep okuwçylary, talyplar we ýaş mugallymlar gatnaşýarlar.

    Çäräniň esasy maksady ýaşlaryň kosmonawtika we astronawtika bilen bagly ylmy gözleglere bolan isleglerini we gyzyklanamalaryny artdyrmaga gönükdirilendir. 

    Iş saparynyň dowamynda Gökmen kosmiki we awiasion okuw merkeziniň binýadynda döredilen “GUHEM” okuw merkezi bilen tanyşdyryş işleri geçirildi. “GUHEM” merkeziniň barlaghanalarynda esasan elektromagnit tolkunlaryny we hadysalaryny beýan edýän, aý we gün tutulmasy ýaly tebigy prosesleriň nähili ýagdaýlarda we şertlerde bolup geçýänligini şeýle hem Dopleriň kanuny ýaly käbir kanunlaryň işleýiş prinsipini beýan edýän eksponatlar ýerleşdirilipdir. Ondan başgada kosmos giňişliginde emeli hemranyň böleklerini daşamak ýada käbir bejergi işlerini ýerine ýetirmek üçin ulanylýan robot manipulýatorlar bilen çärä gatnaşyjylar tanyşydyrylyp, ýörite dolandyryjy panel arkaly birnäçe amallar ýerine ýetirildi.

    Garaşsyz, hemişelik Bitarap Watanymyzyň at-abraýyny, şan-şöhratyny has-da ýokarlandyrmaga gönükdirilen beýik başlangyçlary, bilim ulgamyny ösdürmek ugrunda edýän tagallalary, ýaşlaryň dünýäniň ösen tejribesi bilen ýakyndan tanyş bolamaga döredip berýän giň mümkinçilikleri üçin Arkadagly Gahryman Serdarymyza we Türkmen halkynyň Milli Lideri Gahryman Arkadagymyza köp sagbolsun aýdýarys. 

    Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, il-ýurt bähbitli, bütin adamzat ähmiýetli beýik işleri mundan hem beýläk rowaçlyklara beslensin.

Begenç Annaýew, Kuwwat Abraýew

Türkmenistanyň Telekommunikasiýalar we

Informatika institutynyň mugallymlary